Adat Perkawinan Simalungun

ADAT LAHO MARHAJABUAN /ADAT PERKAWINAN SIMALUNGUN

“Ipukkah bulu balakkei, sigeini bagot puli
Pinukkah ni oppungta na parlobei
Ihutonkonni parpudi.” (Namadear)

Bani aturan pakon adat na tinaktakkonni na ilobei ta, na tarsurat bani surat tombaga holing na so boi lupa na porlu dingaton.
Ase urah urusan ta nabaen do songon sada tiruan ni perkawinan ni sada dalahi goran ni si Adam marga girsang pakon tunangan ni si Bunga boru Sinaga.
Mungkah humbani marpadan-padan nari ronsi das hubani pajaehon na patorang do ijon na porlu-porlu sidalanonkon ai ma :

  1. Parpadanan ni namaposo
  2. Mambere goloman
  3. Pajabu parsahapan
  4. Manggong (pudun saut)
  5. Mamboan indahan paralop (Mangalop boru)
  6. Manaruhkon indahan siopat borngin
  7. Paulak limbas
  8. Pajaehon

A. Parpadanan Ni Namaposo
Bani na sahali laho ma si adam bani sada huta, botangansi pajumpah ma panonggorni pakon sada anak boru. Dob honsi martutur anjaha songon na iparalo-alohon do parsahapan, mahotop ma sidea pajuppah.
Ibuat si adam ma sada siholangni sada puang-puang na dob mabalu. Unduk ma parsahapan napinadas ni siholang, marjanji ma sidea padalan goloman tanda hata na tongon.

Sipatupaon mangihuthon adat na hinan, ai ma :
Pihak dalahi :
Sutting ni inang atappe golang barang tintin, bajut (lupak-lupak) parpuranan, sada pisou badik (pisou suhul gading ) sada gotong (gotong ni bapani)

Pihak naboru :
San lambar hiou na tionun sandiri, anjaha gati ma sonari on tintin ma gattih ni.
B. Mambere Goloman
Anggo domma marsiakuan sidea pasal banggal ni partadingan ni, laho ma si Adam mangayaki anak boru jabuni, jojor ma I patugah padan ni ronsi das bani goloman pinindo ni boru.
Si Bungape malapor ma ia bani anak boru jabu ni laho patugahhon ai. Dob honsi umbuk riah bi abak boru jabu, si Adam pakon namatoras ni ipaikkat ma barang-barang na baen goloman ni ai.
Bani panorang pakon ianan dan tinontuhon (asal ma ulang I rumah ni Bunga), mardomu ma sidea na lima. Siadam pakon anak boru jabuni, si Bunga pakon anak boru jabu ni , pakon si holing.
I paherbang ma gotong, ibagas ma goloman, isurduk hon anak boru jabu ni si adam ma bani boru on parlobei demban sayur dob konsi ai goloman lanjar I sahapkon ma :

“Ai ma da botou, ijon hupadas do bamu ugasni atturang appa tulang tanda jotoh ni padan nasiam na ra do ham hape mangkaholongi ambiaon. Ibagas on do homa sada pisou badik, sai ulang be dong padan na simbei hanjon hu atas”

Dob honsi Ii jalo sinaboru goloman ai, isurduk hon ma homa demban ni rap pakon hiou sorpih (lang isabinghon) irik ma homa ihatahon :

“On ma hiomu botu tanda tongon ni uhur hu bamu”

Sanggah panorang on ma i bahul ari pajabu parsahapan. Porlu do ni puang-puang, dob honsi manjalo goloman ibatasi ma pargaulanni samah na maposo, sonai age dalahi.

Catatan:
Bani panorang sonari on, attap pe lang tarpabagit-bagit be songon turpa ni goloman apari halani ngalutma buaton bahan ni deba, tapi sai na ulang ma lang na baen hapilinan ni tanda tongon ni parpadanan anjaha na itatang ni namatua.

Anggo doma matua banban
Matua ma baluhur
Anggo doma matua badan
Matua ma pakon uhur
Sonari on dong do tarjadi halani porluni panorang pakon inganan padaoh-daoh dob umbuk riah ni namaposo laho marhajabuan ipatugah si dalahi hubani namatorasni.

C. Pajabu parsahapan
Hira-hira tolu ari laho pajabu parsahapan, tugas ni pihak paranak :
1.    Anak boru jabu ( tangga) pakon si Adam ( si Adam : contoh nama anak laki2 yang akan menikah ) laho hu rumah ni anak boru jabu ni si Bunga ( Si Bunga : contoh nama anak perempuan yang akan menikah) mamboan indahan pangkombari ( dayok na masak sada, atur manggoluh ) tujuan ni :
Mangindo podoh, aha ma gatni na porlu sipatupaon laho boanon hu rumah ni tondoh, ampa mangelekhon ase ibobai anjaha iajari marsahap bani tondong ai.
2.    Pasirsirhon siboanan tombuan lengkap pakon isini, demban gulei pan rampahi (tambahan). Halani humbahat do naroh mangihutkon parsahapan, pinahan siopat nahei do ibahen panrapahi.
3.    Manghatahon odoran/rombongan aima: bapa tua, anak boru jabu, anak boru sanina, sanina, si jujung tombuan.
4.    Mamboan sipanganon tugah-tugah bani tulang pamupus ni si Adam, patugahhon na adong parsahapan ni si Adam bani boru na legan. Na dihut hunjai: si Adam, orang tua pakon anak boru jabu. Somal ni mambere duit bona boli ni tulang on hina otik ni pakon mangkatahon :
” Boru ni si ……. ai, doskokn boruku do ai, anggo lang sompat hanami hujai ningon roh do hanima hu jon tapang ase huboruhon,” ( sibobab Dayok Binatur)”

Tugas ni pihak Parboru (Manjalo paranak):

  1. Pasirsirhon dua dayok/dekke sayur lompah ni paranak pakon, demban.
  2. Patugahkon bani hade-hade ase roh bani panorang ai: Tulang pamupus ni si Bunga, bapa tua, sanina, anak boru jabu, anak boru sanina, anak boaru mintori, oppung, simbalog rumah, pangituai ni huta, pangurus ni ugama.
  3. Somalni martomu samon do das paranak hu jabu ni parboru mamboban:
  4. Tombuan marappang-apang (tonggor keterangan ni timbuan)
  5. Bagot sahadingan (na madamol daini) i rudang-rudangi.
  6. Gulei panrampahni
  7. Demban pakon isi ni appa bulung tinapak tutup ni demban ai.

Daskonsi siparanak dohor hon alaman ni parboru, hosei ma anak baru jabu ni parboru :
1.      Mangatur parhundul ni hasuhuton pakon na legan
2.      Das honsi paranak i lambung labah ialo-alo anak boru jabuni parboru lanjar itakkap ma na binoan ni sidea ai lanjar marsisalaman, dob ai ipahundul hampit talaga.
3.      Dob hundul bei, manurduk ma demban ma inang ni si Adam (wakilni) demban tangan-tangan hu luluan jojor bani parboru, ihasomani anak boru jabuni parboru sambil patugah sonaha tuturni si Bunga bani na sinurdukkan demban ai, na margoran demban horas-horas/demban dob roh/das i rumah.
4.      salosei ai, manurduk demban ma use inang humbani sanina ni hasuhuton bani na roh ihasomani anak boaru jabu ni si Adam sambil patugahkon partuturan ni si Adam bani na sinurdukan ai, ai ma demban sisei (demban tangan-tangan).
Salosei na marpuran marsahap ma anak boru sanina/sanina jabuni parboru hubani anak boru jabuni parboru ase isukkun paranak/na roh aha do maksud ni demban horas-horas na dob isurdukkon sidea hubanta.

D. MANGGONG/PUDUN SAUT
Hira-hira 4 ari nari laho maralop, itaruhkon ma indahan panggong. Nadihut hunjai suhut paidua, anak boru jabu (sasatangga) pakon sada naboru sijunjung tapongan.

Siboanon :
Sada tombuan+sada dayok na nolloppah pakon indahan sabalutan marappang-appang.

Sidapotkonon :
Suhut, paidua ni suhut pakon anak boru jabuni parboru.Dobkonsi isurduki demban tangan-tangan, iondoskon ma tombuan ai bani anak baru jabu ni parboru ase mangan.
Doba mangan, isahapkon paranak ma ase ulang huja-huja sidea bani ari paralop na tinontuhon. Ibuat ma bayuon, ipudun ma ai seseuai bani borngin na sihol roh; tiap lopus borngin itinggali ma sada pudun ai ase ualang lepak.
Panorang sonari on bani kalender mando isuratkon.

NB: Parpudi on ulang buei tu panorang tarbuang iparupma indahan panggong pakon indahan paralop na nialopkon riah bani tondong.

Sanggah mamboan indahan paralop holi, dua pasang ma tombuan ibagas tapongan (sapasang paralop, sapasang nari panggong pakon loppah ni ABJ ni parboru jadi 5 dayok ganup)

NB : Domu halani hamajuon pakon penghematan nai homa domma mardalan demban kah-kah tohang (ingat-ingat) sanggah pajabu parsahapan janah lang ilaksanahon be panggong.

Jadi tombuan sanggah paralop pitah sapasang ma tambah dayok loppahni ABJ ni parboru. Jadi tolu ma ganup pakon tolu indahan i bagas balbahul golmaya. Dob isurdukhon pengantin pakon orangtuani paranak tombuan / na ibagas buluh, iatur pinarmanggoluh humbani tondong (parboru na marsanina) sonai homa anggo dong panrappahi (tudu-tuduni sioppat nahei na isayat). Salosei ai iondoshon ABJ ni paranak hubani ABJ ni parboru / dayok (loppahni ABJ ni parboru) pakon indahanni. Sada nari atas suruhni suhut parboru ase iondoshon ABJ ni paranak hubani tondong ni parboru (ambanganni tondong).
Horjaonkonni parboru pakon paranak mandapotkok mata ni horja / pesta.

PARBORU:
a.       Boru ai sandiri do laho marjabu-jabu mamuhun/hubani:
Bapa tua, tulang, bapanggi, ronsi piga-piga diha-diha patut nini uhurni orang tua. Tutur botou pakon si Adam do pangkasomani ni boru on, tapi anggo si Adam lang dihut hu jabu sitohuon (sapari).
Panorang sonari on, gati ma niidah hade-hade do roh hu jabu ni boru manaruhkon indahan, tapi anggo parpaikkatni (bani acara pesta pe i padalan).
b.      anggo siparpesta do, ni hasuhuton ma mambaen tonggo raja pasal on tonggor hal……..(tonggo raja).
c.       Mangontang hade-hade, sonari on, pake surat undangan mando, kecuali tutur tang sihormatan.
d.      Manginjam rumah/gedong pakon manewa alat-alat.

PARANAK:
a.       Mambaen riah tongah jabu (hade-hade tang nasakkan do hassa si dilo on) tujuanni mansahapkon hinahurang ni dabu-dabuan (biaya), nasongon todalanni supak. Sedo halani kaya atap miskin ase ibahen, patandahon bani hade-hade na tongonma sisada anak sisada boru.
b.      Pacetakhon surat undangan
c.       Manghatahon, rombongan na dihut maralop, anggo sapari anak boru jabu mambuat rigapan (bakkar) ai bodari do mangalop boru.
d.      Pasir-sirhon perlengkapan-perlengkapan (alat pelaminan, gonrang, tempat, dapotan panganon ni boru pakon nalegan).
e.       Pasal urusan agama atappe catatan sipil
f.       Pakean penganten, pakon pakean adat
g.      Mangottang anakboru sanina (abs) songon juru bicara, ase mariah parsahapan: tapi anggo sanggup do bapatua boi homa do.
h.      Anggo marpesta do, baenon ma tonggo raja, undangan ma meluas hasoman sinhuta makkoseihon adat pesta.

E. MANGALOP BORU
Mangihuthon adat sapari, anggo orang tua kandung pakon tulang ni anak lang dihut mangalop boru, panorang on masa ma sonai. Bani ari nadop nipudun, borhat ma rombongan paralop hunjabu ni paranak susunan formasini sonon:
Hun lobei ma sijunjung tombuan, parinangon-suhut, sanina, sipanganonkon anak boaru jabu (mamboban pinahan) sapari laho sayaton bani pesta-siombah bajut.

Tugas ni AB sanina ni paranak paingathon sibobanon aima :
Demban partadingan, tombuan, loppah ni AB jabu ni parboru, panrappahi, pinahan na manggoluh, boras, kelengkapan demban, bagot, pakon duit partadingan (pakon kelengkapanni).
Sonai homa AB saninani parboru pangingatkon: dia dayok/dekke sayur na masak ambangan ni paralop (parboru pakon boruni), sada dayok ambangan ni tondong bolon, tapi anggo sipargori/siopat nahei do na binoan ni sidea age lang pala dayok ai. Hunjai ma ibuat ambangan ni tondong.

NB: Ase borat do tanggung jawab ni AB sanina, nasongon protokol adat, songon notaris, pande bani ”gaya bahasa” mengenai ungkapan, uppama, (ase hidup parsahapan ai), sobotoh ruhut, pandei patibal panggaduh marjuma raboyon. Anggo bapatua do sitatang parsahapan ai i goran do ai ABS. Tpai goran parsatokkinan do bani ai sanggah panorang ai.
Das konsi rombongan ni paranak i alaman, ialo-alo ABJ ma, daskonsi i labah ihorasi inang paidua ni suhutma lanjar itakkap na binoan ni sidea i patibal bani hundulan ni sidea i talaga paima isurdukkon bani suhut.
Bingkat ma inang (paranak) manurdukkon demban tangan-tangan hu luluan na margoran demban na dob roh. Balason ni ai roh ma demban ni parboru sinurdukkon ni inang suhut paidua (demban sisei).

Manungkun podah ma ABJ si Adam bani ABJ si Bunga, aha ma use silaksanahon.

Ingat!!: Haganup sihataonkonni paranak bani parboru ningon tiba anakboru jabuni do, leganma anggo parbonani andar hinan ia (Marboru tulang).

Acara Parsahapan:
Dobkonsi ipadear parhundul, sibiak suhut, sanina, sapanganonkon pakon tondong i lulluan, siparalop i talaga, AB jabu i tongah-tongah, i pukkah ma parsahapan bolon:

ABJ Bunga :
Sasei mula ni hata, sukkun mula ni uhum, domma hita mardemban, sai tio ma panonggor tio ma paruruhan. Hundul hita marlou-lou, nasi tulang i luluan boru i talaga, i jabu na martuah on, humpul ma tongon tuah tampei ma rajoki, gar-gar na pinahan marlimbuah na sinuan, daoh ma bala susur ma tuah, tumpakon ni Ompungta Naibata. Napungkah parsahapan lang marbona, ai martampuk do bulung marbona sangkalan, marnata do suhut i tongah-tongah adaran. Halani ai pasir-sir nasiam apuran, apuran panungkunan bani tondongta hu luluan.

ABJ Adam :
(dob-dob jolom pinggan marisi demban):
Tangan do borohon ujungni jari-jari, jari-jari sapuluh marsiganjang-ganjangi, Parlobei ma hanami padaskon hata satabi, apuran panungkunan sir-sir pakon atupni, sipadason bani tondong, sidabuh uhum pakon aturan bani sahap bolon i tongah ni adaran. (manurduk ma ia sambil mamontingkon kain sarung hundul sombah).

ABJ Bunga:
(I tangkap ma demban ai) :
Hata sipaimaon, sungkun-sungkun sibalason. Mardangkah jabi-jabi, marduri ma tatada, marsahap marsantabi tanda ma anak ni raja. Ase padas nasiam ma sahap nasiam.

ABS Adam/ ABJ Adam:
Santabi bani tondong, manluar hanami hun talaga; mardingat pudun saud, ari na nirumang ni anak boru jabu, nani rajahonni tolu sahundulan/dalihan na tolu. Bingkat do hanami marodoran na ganjang, mansuhuni padan, padan na dob ni ambung utang na dob pinudun. Ase ulang hanami holi isobuttappua jantan, pandei marruba-ruba, lang pandei marsidobi. Jadi manuhuni padan do hanami. Ase marpodah ma nasiam tondong aha ma use sibahenon.

ABS Bunga:
Tupa ma tongon, si botoh uhum do nasiam si dingat padan, padan na dob sinurat bani tombaga holing, marpartoguh do huta, marpanjaga do horbangan, marbona do andar, mardinding do jabu, marodoran songon na mardalan.
Hundul do ijon anak boru jabu nami, tukkot bai na landit rigapan bai na golap, na tirjak hu lobei torjang hu pudi, nai homa sijaga bahal ni huta pakon jabu na martuah on.
Padalan na siam ma lobei apuran bani ABJ nami, apuran parhombaran marbatu. Apuran/ demban parhombaran marbaru (banggal ni batuni bo do iigil ABS Bunga atab ABJ Bunga ase itambahi otik nari, seni do ai)

Dob demban parhombaran ABJ Adam padalan apuran/demban buka horbangan na manjalo pengetua ni huta (marbatu, lang somal mangindo tambah). Dob ai apuran/demban runtas ding-ding na manjalo aima boruni hasuhuton do marhosei pasal ianan i rumah ni tondong.

ABJ Adam:
Tupa ma tongon, (sambil jolom apuran marpinggan): Sada sitok-tok hitei gaoup marhitei honsi; abang on do tongon hitei nami roh bai nasiam tondong, patuduh lapang sibere dalan.
Jalo hamma abang sonai age kaha, siganda sigandaua ma urat ni podom-podom na sada gabe dua natolu gabe manggolom pansarian ma nasiam.
(dobkonsi ibuka, anggo hurang marhak do ia mangindo tambah).

ABJ Bunga :
Domma hujalo haduasi tulang, hombar tongon bani uhum tipak bani aturan: horasma. (jong-jong ma ia sambil idilohon) : Hita sagala boru jabu on domma hujalo apuranta marapuran ma hita. Age au sijolom ruhut, nasiam do anggo si panrahut.

ABJ Adam:
Malas do uhur nami bai nasiam boru pakon sinhuta on, marsiatupan songon langkop ni abal-abal marsada songon lowoh ni randu, tupa ma tongon.

NB: * Bani piga-piga ianan dob mardalan demban tuntas ding-ding dong do napadalan Demban Buha Sahap pasang marbatu hubanihasuhutan parboru/namarsanina isurdukhon nABJ Adam (paranak). Maksudni ase buka panonggor, bukama homa labahni pansarian/rajoki tumpakon ni Tuhan Naibata.

ABS Bunga:
Nasiam boru nami pakon hita na marsanina age tondong nami domma hita mardemban, noma torang maksud parrohni paranak/borunta aima mamuhuni padan, domu ma riahta ase susur ma tuah, ondos ma rajoki, dear ma nini uhur nami ase isurdukhon sidea paranak ma tombuan ase mangan hita.

NB 1 :
Bani nadeba paima mangan ijon ma mardalan namalum na utama hubani suhi ni appang aima ( pasang) hubani :
a.    Namatoras ni boru laho
b.    Bapa tua
c.     Tulang pamupus ni boru laho
d.    Anak boru jabu

Namalum on pasang-pasang do marpangiring homa pakon marbatu demban. Namanurdukkon namalum aima boru laho, pangiringi calon pargotongni ( boi do rap manurdukkon). Mase mardalan namalum, nini namatua sapari halani bani panorang on ma boru laho minta maaf ase malum sagala paruhuran marhiteihon atap dong kesalahan ni boru laho sadokah on humbani ha etek-etekon nari das hubani na laho borhat ma ia mangayaki harosuhni hu rumah ni halak (paranak) sekaligus mohon doa restu. Nai do homa hubani Bapa Tua, minta maaf ia, halani Bapa Tua di sittuhunni adat i rumah ai pakon panggattih ni oppungni. Tulang pamupus ni boru laho pe dapotan halani ia do pamupus ni pakon na mambere podah-podah na dohor humbani ha etek-etekon nari anajaha pori banggor-banggor Tulang ni do mambursik ase hipas-hipas. Anak boru jabu dapotan hani Anak boru jabu do na loja bani paradaton i rumah ai anjaha manurut adat sapari ningon maranak ni amboru ia, halani ai minta maaf pakon doa restu ia bani ABJ.

Sonari on berkembang ma use pasal na dapotan namalum, dapotan ma/das hubani :
1.      Tondong/tulang ( Pamupus ni bapa boru laho)
2.      Tondong ni tondong ( na mamupus/tulang ni inang boru laho)
3.      Pariban hasuhutan
4.      Makkela/amboru (parorot) ni boru laho, pakon persadaan ni boru haganup)

NB 2 :
a.      Tonggor acara laho mangan sanggah pajabu parsahapan
b.      Tambah keterangan tobuan bani pudun saut/ panggong
c.       Panorang mangan domu bani situasi anggo lape panorang mangan itorushon parsahapan.

Sumber :
1.   http://sembiring-jo.blogspot.com/2010/05/adat-laho-marhajabuan-adat pernikahan_16.html
2.  “Adat simalungun” na isusun partuha maujana simalungun, 2002
3.  http://garamasilimakuta.blogspot.com/

4.Photo Sampul Melly Zamri ,menikah dengan adat simalungun dan minangkabau “http://www.lovelytoday.com/”

 
lazada.com

Related Posts Plugin for WordPress, Blogger...


Leave a Reply

Your email address will not be published.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>